Frétt úr Bæjarpóstinum frá því á föstudaginn.

Snjóframleiðsluvélar í Böggvisstaðafjall? Undanfarna mánuði hafa forsvarsmenn Skíðafélags Dalvíkur unnið að kanna grundvöll fyrir því að kaupa snjóbyssur (snjóframleiðsluvélar) til að setja upp í Böggvisstaðafjalli. Lauslega útskýrt virka snjóbyssurnar þannig, að þær taka inn á sig vatn, frysta það, og með sérstöku dreifikerfi er síðan snjó úðað yfir skíðabrekkurnar. Óskar Óskarsson, formaður Skíðafélags Dalvíkur, segir að með þessu sé verið að bregðast við breyttu veðurfari og minni snjó eins og staðreyndin hafi verið undanfarna vetur. "Við erum í rauninni að berjast fyrir því að halda Dalvík inni á kortinu sem framtíðarskíðasvæði á Norðurlandi. Ef ekkert verður að gert þá drögumst við bara afturúr og það uppbyggingarstarf sem unnið hefur verið í Böggvisstaðafjalli undanfarin þrjátíu ár verður að engu og það held ég að enginn vilji. Við reynum að horfa á þetta út frá hagsmunum heildarinnar, með ferðaþjónustuna sem útgangspunkt, því fullyrða má að megnið af þeim ferðamönnum sem hingað kemur yfir vetrartímann til lengri eða skemmri dvalar, er að sækjast eftir því að komast á skíði." Vinna að fjármagna kaup á snjóframleiðsluvélunum og tilheyrandi búnaði er þegar hafin. "Við höfum leitað til einstaklinga, fyrirtækja og stofnana og óhætt að segja að þær undirtektir sem við höfum fengið lofi góðu. Þetta er hins vegar kostnaðarsöm framkvæmd svo við þurfum á miklum velvilja að halda til að þetta megi takast," sagði Óskar Óskarsson að lokum.